Գրադարանավարի օրվա կապակցությամբ ՀՀ կրթութեան, գիտութեան, մշակոյթի եւ սպորտի նախարար Ժաննա Անդրեասեանը ոլորտի մի շարք ներկայացուցիչներ պարգեւատրել է ԿԳՄՍՆ մեդալով, պատվոգրերով ու շնորհակալագրերով։

 

Նախարարը շնորհակալութիւն է յայտնել երկարամեայ բարեխիղճ ու շնորհակալ աշխատանքի համար՝ ընդգծելով նրանց ավանդը գրադարանային գործի զարգացման եւ ընթերցանութեան խթանման ուղղութեամբ։

 

Ժաննա Անդրեասեանի նշմամբ՝ Կառավարութեան նոր ծրագրում ընթերցանութեան խրախուսումն առաջնահերթութիւն է․ իրականացուելու են բազմաթիւ նոր ծրագրեր՝ միտուած հանրութեան շրջանում ընթերցանութեան մակարդակի բարձրացմանը։

 

Նա անդրադարձել է նաեւ 15 տարեկան դպրոցականների շրջանում անցկացուած միջազգային հետազօտութեան արդիւնքներին՝ շեշտելով, որ ուսումնական հաստատութիւնների անելիքներին զուգահեռ շատ կարեւոր է նաեւ գրադարանների դերը:

 

«Գրադարանները իսկապէս պէտք է համայնքային կենտրոններ լինեն եւ դառնան բոլոր տարիքի մեր քաղաքացիներ համար ամենահաճախ այցելուող վայրերից մէկը: Ընթերցանութիւնը շատ աւելի խորը արմատներ է ձգում այնտեղ, որտեղ այն ուղեկցուում է կարդացած նյութի քննարկմամբ, կարծիքների փոխանակմամբ: Գրադարաններն այն տարածքներն են, որտեղ պէտք է տեղի ունենան ընթերցումներ ու քննարկումներ․ այստեղ գրադարանավարներն ունեն շատ կարեւոր անելիք՝ հուշելու հետաքրքրող թեմաների շրջանակում՝ ինչ գրականութիւն ընթերցել: Անչափ կարեւորում են նաեւ գրադարանների եւ կրթական հաստատութիւնների սերտ համագործակցութիւնը եւ ուրախ եմ, որ որոշ գրադարաններ այս ուղղութեամբ ակտիվ աշխատում են»,- նշել է նախարարը:

 

Ժաննա Անդրեասեանը կարեւորել է նաեւ գրադարանավարների շարունակական վերապատրաստումները եւ հավելել, որ նախընթաց շրջանում արդեն իրականացուել են բազմաթիւ վերապատրաստումներ, այդ թվում՝ միջազգային գործընկերների աջակցութեամբ․ նմանօրինակ նախաձեռնութիւնները կլինեն շարունակական։

 

Ընդգծելով, որ 2026-2027 ուսումնական տարին նախարարութիւնը յայտարարել է «Ընթերցանութեան տարի»՝ Ժաննա Անդրեասեանն հորդորել է գրադարանային ոլորտի աշխատակիցներին լինել աւելի նախաձեռնող կրթական հաստատութիւններին օժանդակելու, համատեղ նախաձեռնութիւններ եւ ծրագրեր իրականացնելու գործում:

 

Հանդիպման ընթացքում նախարարը գրադարանային ոլորտի ներկայացուցիչների հետ քննարկել է նաեւ առաջիկայում մեկնարկող ատեստավորման գործընթացին վերաբերող մի շարք հարցեր.

 

«Կառավարութեան ծրագրով գրադարանավարների աշխատավարձերի բարձրացում է նախատեսուած: Գործառոյթները, աշխատանքի հանդէպ պահանջները տարբեր են, ուստի կառանձնացվեն մասնագիտական համապատասխան խմբեր եւ յուրաքանչյուր խմբի համար՝ ըստ պաշտօնի եւ պարտականութիւնների նկարագրի, կկազմակերպուի ատեստավորում, որը կապահովի նաեւ վարձատրութեան նկատելի բարձրացում»,- նշել է նախարարը եւ հավելել, որ ատեստավորման գործընթացը կնպաստի գրադարանային ոլորտի աշխատակիցների սոցիալական երաշխիքների ամրապնդմանը, ինչպես նաեւ ոլորտում երիտասարդ կադրերի ներգրավմանը: