Իրավապահների դանդաղկոտությունը հնարավորություն է տալիս կոռուպցիոներների մի մասին փախչել Հայաստանից. Վարչապետը բավարարված չէ կոռուպցիայի դեմ պայքարի արդյունքներից (ՏԵՍԱՆՅՈՒԹ)

26-02-2020 13:41:02   | Հայաստան  |  Քաղաքական
Իրավապահ համակարգի դանդաղկոտությունը հնարավորություն է տալիս կոռուպցիոներների մի մասին փախչել Հայաստանից, մյուս մասի համար հանցանշաններն ու ապացույցները թաքցնելու, քողարկելու պատուհան է բացում: 
 


Այս մասին այսօր կառավարությունում հրավիրված խորհրդակցության ընթացքում հայտարարեց ՀՀ վարչապետ Նիկոլ Փաշինյանը՝ հիշեցնելով, որ 2018 թվականի մայիսից Հայաստանում հայտարարվել է կոռուպցիայի դեմ անհաշտ պայաքար, ինչն արժանացել է ոչ
միայն Հայաստանի հանրության հավանությանը, այլև՝ միջազգային հանրության ուշադրությանը: 
 
«Չնայած որ հայտարարել եմ՝ կոռուպցիայի դեմ պայքարի ծավալներն աննախադեպ են, բայց ես բավարարված չեմ դրա արդյունքներով, համոզված եմ՝ դրա արդյունքներով բավարարված չէ նաև հանրությունը»,- ընդգծեց վարչապետը: 
 
Ըստ նրա՝ տվյալ դեպքում ինքը նկատի ունի ոչ այնքան կոռուպցիոն գործերով դատավճիռների կայացումը, որքան պետությունից
ու ժողովրդից գողացված միջոցների վերադարձը Հայաստանի պետական գանձարան: 
 
«Բայց թույլ տվեք այս առումով նույնպես հիմնավորել կոռուպցիայի դեմ տարվող պայքարի ծավալների աննախադեպ լինելը: Հատկանշական է այն վիճակագրությունը, որը ներկայացրել Հատուկ քննչական ծառայությունը: Ըստ այդմ՝ 2019 թվականի գործունեության ընթացքում քրեական գործերով վերականգնված գումարը կազմել է 4 մլրդ 331 մլն դրամ, որը յոթ անգամ ավել է, քան ՀՔԾ-ի ողջ նախորդ ընթացքում ծառայությունում քննված գործերով վերականգնված գումարը միասին: Նույն կամ մոտավորապես նույն իրավիճակն է նաև այլ իրավապահ մարմիններում: Ազգային անվտանգության ծառայության 2019 թվականին վերականգնված գումարը 2017 թվականի համեմատ ավել է, ուշադրություն դարձրեք, 1371 տոկոսով: Քննչական կոմիտեում 2019 թվականի վերականգնումները 2017 թվականի համեմատ ավել են 462 տոկոսով: Ոստիկանությունում 2019 թվականի վերականգնումները 2017 թվականի համեմատ ավել են, թվին ուշադրություն դարձրեք, 10767 տոկոսով»,- մանրամասնեց Ն. Փաշինյանը: 
 
Նրա բունթագրմամբ՝ ներկայացված վիճակագրությունը տպավորիչ է, եթե ոչ սենսացիոն: 
 
Վարչապետի խոսքերով, եթե ներկայացված տոկոսները վեր են ածվում թվերի, ապա պետք է արձանագրել, որ 2018 թվականի Թավշյա հեղափոխությունից հետո ամենալավատեսական հաշվարկներով կոռուպցիոն  գործերով վերականգնվել է 150 մլն դոլարի վնաս՝ ներառյալ Պետական եկամուտների կոմիտեի և քննչական վարչությունում քննվող վարույթների շրջանակում տեղի ունեցած վերականգնումները: 
 
 

 
 
 
Մանրամասները՝ տեսանյութում
Էլիզա Զախարայն, «Նոյյան Տապան»
Նոյյան տապան   -   Քաղաքական
Լուրեր Հայաստանից եւ Սփյուռքից

Կարդացել են 1623 անգամ
Noyan Tapan - Նոյյան տապան
Facebook Group · 3 365 անդամ
Միանալ խմբին
Միացեք մեր «Ֆեյսբուքյան» խմբին՝ մեր հաղորդումները քննարկելու եւ բանախոսներին հարցեր ուղղելու համար



Բաժանորդագրվեք «Նոյյան Տապան»-ի մեր էջերին«Յութուբում», «Ֆեյսբուքում» Եւ «Թվիթերում»` մեր հաղորդումներն անվճար դիտելու համար